આ કેવા દિવસો આવ્યા છે?
મંદિર ખાલી જાન નથી, આ કેવા દિવસો આવ્યા છે,
પથ્થર છે ભગવાન નથી, આ કેવા દિવસો આવ્યા છે.
તાક્યું જ્યાં નિશાન નવું મન બોલ્યું ખોટું થાશે આ,
સાચું શરસંધાન નથી, આ કેવા દિવસો આવ્યા છે.
તકલીફો વધતી રહેતી મન ગભરાતું સમજાય નહીં.
હોઠો પર મુસ્કાન નથી, આ કેવા દિવસો આવ્યા છે.
રોજ સલાહો આપ્યા કરતા સંભાળો ને જાત અહીં,
આજે એને ભાન નથી, આ કેવા દિવસો આવ્યા છે.
એક દિવસ ભૂલો પડજે ભગવાન અહીં છે આમંત્રણ,
આજ ઘરે મહેમાન નથી, આ કેવા દિવસો આવ્યા છે.
સાંજ પડે દીવો કરવાનો રિવાજ અહીં આજે ત્યાં,
ધૂપ અને લોબાન નથી, આ કેવા દિવસો આવ્યા છે.
કાજલ બોલી ઘરમાં શાંતિ ગમતી પણ આ શરતે નહિં,
આંગણમાં તોફાન નથી, આ કેવા દિવસો આવ્યા છે.
ગાગાગાગા ગાગાગાગા ગાગાગાગા ગાગાગા
કાજલ
કિરણ પિયુષ શાહ
૩૦/૦૫/૨૦૨૧
