ક્યમ ના ચૂમું ?
ક્યમ ના ચૂમું?... ક્યમ ના ચૂમું?
જો ના ચૂમું... તો તો પછી
લાવણ્ય ઝરતા આ પ્રિયે ! સૌંદર્યનું સાર્થક્ય શું ?
નારીત્વ ને પૌરુષની પ્રીતિ તણું માધુર્ય શું ?
હૈયા તણા માધુર્ય ને પ્રીતિ કહે છે સૌ પ્રિયે !
ને દેહના માધુર્ય ને સોંદર્ય કહેવાયું ખરે!
વસ્તુ ખરે તો એક છે, પ્રાકટ્યમાં બસ ભેદ છે.
ક્યમ ના ચૂમું હું તને ?
આ હોઠ ચૂમે હોઠને... સૌંદર્યની સંધિ મળે,
પણ અંતરે અંતર ચૂમે છે, સામસામી પ્રીતને
એ કેમ તું ભૂલે પ્રિયે !
આ પ્રેમનો રસ વ્યાપતો, અંગાંગમાં રૂપ આપતો;
એ પ્રેમ પણ સૌંદર્ય છે - આત્મા તણું, એ કાં ભૂલે?
--- મીનપિયાસી (Dt. 11/12/53)
