Poem quotes are very popular on BitesApp with millions of authors writing small inspirational quotes in Gujarati daily and inspiring the readers, you can start writing today and fulfill your life of becoming the quotes writer or poem writer.
જૂનું બધું યે નવું થાય, એ નવું વરસ કહેવાય
થવા જેવું યે ઘણું થાય, એ નવું વરસ કહેવાય
દોડી દોડી હાંફી હાંફી
ભાગો જેની પાછળ
એ જ અચાનક આવી ઊભું
રહે આપની આગળ
ઇચ્છો એવું બધું થાય એ નવું વરસ કહેવાય !
થવા જેવું ઘણું થાય એ નવું વરસ કહેવાય !
તારા વિના બધુ જ જૂનું
એવું ગમતી વ્યક્તિને કહેજો
નવા વરસે થોડું તો થોડું
એની સાથે રહેજો
આખા જગમાં જેટલું સુખ હોય
બધું તમારું થાય…
થવા જેવું ઘણું થાય એ નવું વરસ કહેવાય !
નવા વરસે એ બધું જીવો
જે કદીયે જીવ્યા ન્હોતા
નવા વરસે એ બધું કહો
જે કદીયે બોલ્યા ન્હોતા
નવા વરસમાં સમય આપનો
નવો શરૂ થાય…..
થવા જેવું ઘણું થાય એ નવું વરસ કહેવાય !
અજવાળાનો ડર લાગે તો
અંધારાને મળજો
એક નાનકડો દિપ પ્રગટાવી
સૂરજ સામે ધરજો
નવા વરસે જે પણ થાય એ બધું
મજાનું થાય….
થવા જેવું ઘણું થાય એ નવું વરસ કહેવાય !
