હા પછીની ના તને પરવડે તો આવજે
ભાંગલો વે’વાર છે,પરવડે તો આવજે
એકલું ઓજસ નથી જિંદગીનાં ઓરડે
ક્યાંક અંધારૂં ય છે,પરવડે તો આવજે
આજ છે જે આપણાં એમનું નક્કી નથી
પારકા પણ નીકળે પરવડે તો આવજે !
બહુ બધું બદલી ગયું ‘ને હજૂ બદલાય છે
માનસિક્તા એજ છે પરવડે તો આવજે
દ્રષ્ટિશાળી આંખ, ‘ને કાન સરવા રાખવા
જોખમી સાબિત થશે પરવડે તો આવજે !
ટાળવાની ટેવ ભારે પડે, એવું બને
સત્ય છે, કડવું હશે પરવડે તો આવજે !
ભૂખ વેઠો કે તરસ ફેર કંઇ પડતો નથી
જીવતા રે’વું પડે પરવડે તો આવજે !
