વાણી કરી શકે ન વિસ્તાર દેવાધિદેવ મહાદેવ.
જેને ભજવાથી જીવનસાર દેવાધિદેવ મહાદેવ.
નાથભોળા સહજમાં તુષ્ટ થૈને આપે વરદાન,
જેનાં સ્મરણે સુધરે સંસાર દેવાધિદેવ મહાદેવ.
ભૂજંગભૂષણ, ભયહારી, ભગવંતલીલા ન્યારી,
શરણાગતને ના સાંપડે હાર દેવાધિદેવ મહાદેવ.
ચિતાભસ્મ અંગઉપાંગે ભાલે સુધાકર સોહતો,
જેનો પૂજનીય છે પરિવાર દેવાધિદેવ મહાદેવ.
પંચાક્ષર પોત પ્રકાશે થાય જીવ શિવ તદાકાર,
કોઈનો કદીએ ન રાખે ભાર દેવાધિદેવ મહાદેવ.
શરણે રાખો, સદવિચાર આપો દિલના દાતાર,
આપો રામભક્તિ ભારોભાર દેવાધિદેવ મહાદેવ.
ભૂલો અમારી ભૂલ બધીને માફ કરો નંદીસવાર,
રીઝો કરીએ જલદુગ્ધ ધાર દેવાધિદેવ મહાદેવ.
ચૈતન્ય જોષી. ' દીપક ' પોરબંદર.
