✨ ತಡವಾಗಿ ಅರಿತ ಸತ್ಯ – ಎಲ್ಲೆಡೆ ಇರುವ ಭಗವಂತ
ಪರಿಚಯ
ಮಾನವನು ಅನೇಕ ಬಾರಿ ದೇವರನ್ನು ದೇವಾಲಯಗಳ ಗೋಡೆಗಳೊಳಗೆ, ಮೂರ್ತಿಗಳೊಳಗೆ ಮತ್ತು ಆಚರಣೆಗಳೊಳಗೆ ಮಾತ್ರ ಹುಡುಕುತ್ತಾನೆ. ಆದರೆ ಭಗವಂತನು ಪ್ರಕೃತಿಯ ಪ್ರತಿಯೊಂದು ಕಣದಲ್ಲೂ, ಪ್ರೀತಿಯ ಪ್ರತಿಯೊಂದು ಸ್ಪರ್ಶದಲ್ಲೂ, ಕರುಣೆಯ ಪ್ರತಿಯೊಂದು ಕಣ್ಣೀರ ಹನಿಯಲ್ಲೂ ನೆಲೆಸಿದ್ದಾನೆ. ತಡವಾಗಿ ಆದರೂ ಈ ಸತ್ಯವನ್ನು ಅರಿತ ಭಕ್ತನ ಅಂತರಂಗದ ಪ್ರಾರ್ಥನೆಯೇ ಈ ಕವಿತೆಯ ಮೂಲಭಾವ.
ಕವಿತೆ
ಕ್ಷಮಿಸಿಬಿಡು ಗುರುವೇ,
ನಿನ್ನಡಿಗೆ ಬಂದಿರುವೆ.
ಕಣ್ಣಿದ್ದೂ ಕುರುಡನಾದೆ,
ನಿನ್ನ ನಾ ಕಾಣದೆ॥
ಜಪದ ಜಾಲದಿ ಸಿಲುಕಿ,
ಜಡದ ಶಿಲೆಯಲಿ ನಿನ್ನ ಹುಡುಕಿದೆ.
ಅಡಿಗಡಿಗೂ ನೀ ನನ್ನೊಡನಿದ್ದೆ,
ನಾ ನಿನ್ನ ಗುರುತಿಸದಾದೆ॥
ಬಿಸಿಲ ಬಲೆಯಲಿ ಬಳಲಿದ ನನಗೆ,
ನಿಂತೆ ನೀ ಮರದ ನೆರಳಾಗಿ.
ಬಾಯಾರಿದೊಡಲ ಬೇಗೆ ತಣಿಸಲು,
ಸುರಿದೆ ನೀ ಮಳೆಯ ನೀರಾಗಿ॥
ಅಡಿಗಡಿಗೂ ನೀ ನನ್ನೊಡನಿದ್ದೆ,
ನಾ ನಿನ್ನ ಗುರುತಿಸದಾದೆ॥
ನೊಂದ ಮನಕೆ ಸಾಂತ್ವನ ಹೇಳುವ
ಮಧುರ ನುಡಿಯಾಗಿ ನೀ ನೆಲೆಸಿದ್ದೆ.
ಬಡ–ಬಗ್ಗರ ಕಣ್ಣೀರ ಹನಿಯಲ್ಲಿ,
ಮೊಳಕೆಯೊಡೆದ ಕರುಣೆಯಾಗಿ ನೀ ಇದ್ದೆ॥
ಅಡಿಗಡಿಗೂ ನೀ ನನ್ನೊಡನಿದ್ದೆ,
ನಾ ನಿನ್ನ ಗುರುತಿಸದಾದೆ॥
ಗಾಳಿಯ ತೊಟ್ಟಿಲಲಿ ತೂಗಿಸಿ,
ಸವರಿದೆ ನನ್ನ ತಲೆಯನು.
ಇರುಳಲಿ ತಾರೆಯ ಬೆಳಕಾಗಿ,
ತೋರಿದೆ ಬದುಕಿನ ದಾರಿಯನು॥
ಅಡಿಗಡಿಗೂ ನೀ ನನ್ನೊಡನಿದ್ದೆ,
ನಾ ನಿನ್ನ ಗುರುತಿಸದಾದೆ॥
ದೇವಾಲಯದ ಕಲ್ಲಿನೊಳಗೆ ಮಾತ್ರವಲ್ಲ,
ದಯೆಯ ಹೃದಯದಲ್ಲೇ ನೀ ವಾಸ.
ಇಂದಾದರೂ ಅರಿವಾಯಿತು ಗುರುವೇ,
ನಿನ್ನ ಕೃಪೆಯೇ ನನ್ನ ಉಸಿರಿನ ಶ್ವಾಸ॥
✍️ ರಚನೆ: A D PATIL
ದೇವರನ್ನು ಕಂಡುಕೊಳ್ಳಲು ದೂರದ ಯಾತ್ರೆಗಳು ಅಗತ್ಯವಿಲ್ಲ. ಪ್ರೀತಿ, ದಯೆ, ಕರುಣೆ, ಪ್ರಕೃತಿ ಮತ್ತು ಮಾನವೀಯತೆಯ ಪ್ರತಿಯೊಂದು ಕ್ಷಣದಲ್ಲೂ ದೇವರ ಸಾನ್ನಿಧ್ಯವನ್ನು ಅನುಭವಿಸಬಹುದು. ದೇವರು ಕಲ್ಲಿನ ಮೂರ್ತಿಗಳಲ್ಲಿ ಮಾತ್ರವಲ್ಲ, ಜೀವಂತ ಹೃದಯಗಳಲ್ಲಿ ನೆಲೆಸಿದ್ದಾನೆ ಎಂಬುದೇ ಈ ಕವಿತೆಯ ಮುಖ್ಯ ಸಂದೇಶ. ಜೀವನದಲ್ಲಿ ನಮ್ಮೊಂದಿಗೆ ನಿಂತ ಪ್ರತಿಯೊಂದು ಒಳ್ಳೆಯ ಮನಸ್ಸಿನಲ್ಲೂ ದೈವತ್ವವನ್ನು ಕಾಣುವ ಮನೋಭಾವ ಬೆಳೆಸಿಕೊಳ್ಳಬೇಕು.
ದೇವರನ್ನು ಕಾಣಲು ದೂರದ ಯಾತ್ರೆ ಬೇಡ; ದಯೆಯ ಹೃದಯ, ಕರುಣೆಯ ಕಣ್ಣೀರು, ಪ್ರಕೃತಿಯ ಉಸಿರು ಮತ್ತು ಪ್ರೀತಿಯ ಸ್ಪರ್ಶದಲ್ಲೇ ಭಗವಂತನು ನೆಲೆಸಿದ್ದಾನೆ.
ಓದುಗರೇ, ನೀವು ದೇವರನ್ನು ಯಾವ ರೂಪದಲ್ಲಿ ಅನುಭವಿಸಿದ್ದೀರಿ? ನಿಮ್ಮ ಅಮೂಲ್ಯ ಅಭಿಪ್ರಾಯಗಳನ್ನು ಕಾಮೆಂಟ್ನಲ್ಲಿ ಹಂಚಿಕೊಳ್ಳಿ.
.
