શિવના શરણમાં આવું. અંતરભાવ લાવું.
દેવ દિલાવર ને હું તો મનાવું.
આશુતોષ શિવ અંતરયામી.
વંદન કરીએ શીશ નમાવી
ભોળાનાથ ભક્તભયહારી
રીઝો દેવ ઉરભાવ સ્વીકારી
પુલકિત ગાત્રે નયન ઊભરાવુ...1
દોષો અમારા દયાનિધિ ભૂલો.
કરીએ સંમુખ એકરાર ખુલ્લો.
ભોલે ભંડારી ભક્તિ આપો.
હરો જગતના કોટિ સંતાપો.
કરી પ્રાર્થનાને શરણાગત થાઉં...2
આટલી આરઝૂ ઉર ધરો પ્રભુ
અંતરયામી શું કહેવું શંભુ.
કરુણાકારી કષ્ટ નિવારો.
ના વિચારો સારો નઠારો
રોમેરોમ શિવ સ્મરણ કરાવું...3
કર જોડી વિનવું હે કૈલાસવાસી.
દર્શન કાજે શંભુ નૈન પિયાસી.
નાથ સદાશિવ ભવપાર તારો
એક મારે બસ શંકર સહારો
દિલતાર જોડીને ભજન ગાઉ...4
-ચૈતન્ય જોષી 'દિપક' પોરબંદર.
