બે ચાર મિત્રો જેનાં વાચક બની શકે છે!
એ પણ બધા કવિ કે લેખક બની શકે છે!
લાગે જે ફૂલ જેવી, કંટક બની શકે છે!
ખોટી હો વાહવાહી ભ્રામક બની શકે છે!
પ્રસ્તાવના લખે જો મોટા ગજાના માણસ,
જોડકણાં પણ કોઈના પુસ્તક બની શકે છે!
એક નામ કેવું ભારે, ખુદ્દારીથી ય મોટું!
'એવોર્ડ' માટે કોઈ યાચક બની શકે છે!
ભૂલો છુપાવવાનું કૌશલ્ય એથી વિકસ્યું,
જાણે છે એય મૂંગા પ્રેક્ષક બની શકે છે!
આખા નગરમાં એવા એકાદ બે મળે, જે
ખુદનું કરી વિસર્જન સર્જક બની શકે છે!
સંદીપ પુજારા