રહી નથી જો જગા કોઈ શબ્દ કાજે, તો
ચલ એકમેકની આંખોને પીએ આજે તો
મજાકમાં જ ભલે, તે કહ્યું, "ગમે છે તું"
હતું શું એવું? કે ઘેલી કરી અવાજે તો
શરમ 'ને સાદગી આભૂષણો બની જાશે
હૃદયની રાણી કહી તું મને નવાજે તો
મળ્યા છે મન, તો એ વાતે મનાવી લઉં છું મન
પૂરી થવા ક્યાં દીધી ઝંખના રિવાજે તો!?
વચન દીધું છે જે સંયમનું, દિલથી પાળ્યું છે
કસોટી મારી કરી રોજ ઢળતી સાંજે તો
ગગનથી વરસે કે ના વરસે એ કહી ના શકું
નયનથી વરસે છે, વાદળ પ્રણયના ગાજે તો
અંજના ભાવસાર 'અંજુ'
