પળે પળે જ્યાં તું રંગ બદલે રે મનવા, તારો ભરોસો નવ થાય
ઘડીમાં સાધુસંગ તું ડોલે, ઘડીમાં તો પાપમાં ડૂબી જાય - રે...
ચંચળતામાં સદા રાચીને, અસ્થિર રહે તું સદાય - રે...
સ્વાર્થ ન સમજે, આદત ન છોડે, ફરતું રહે તું સદાય - રે...
સમજાવ્યું ઘણું, સમજે જરા, ફરી પાછું ત્યાં ને ત્યાં જાય - રે...
ફરે ઘણું ને ફેરવે ઘણું, થાકે તોયે દોડતું રહે સદાય - રે...
રંગે રંગે રંગાઈ, રંગ બદલતું રહે, એકરંગે મુશ્કેલીથી રંગાય - રે...
જનમોજનમથી આ કરતું રહ્યું, આદતમાં ફરક ના પડે જરાય - રે...
શક્તિશાળી છતાં શક્તિહીન રહે, આ તો સમજ્યું ના સમજાય - રે...
આતમ સાથે રહે તો સદાયે, ને માયાના રંગે રહે રંગાય - રે...
સદ્દગુરુ દેવેન્દ્ર ઘીયા (કાકા)
