ગઝલ..જિંદગાની ધકેલપંચા...!!!
ના રહ્યું આભ ઊડવા લાયક,
ના રહી ભૂ* ટહેલવા લાયક.
ભાઈ થોડું તમે, અમે થોડું;
લ્યો ખસેડો, ખસેડવા લાયક.
તોય લોકો ઉખેળવાના એ,
વાત ના હો ઉખેળવા લાયક.
ઊછરી ના ખુશી,બચી છે એક;
બસ ઉદાસી ઉછેરવા લાયક.
ઓઢવા આભ હોય નિર્ધનને-
શુષ્કત્વચા પહેરવા લાયક.
જિંદગી હાથથી ગઈ વીતી,
શ્વાસ પણ અલ્પ ખેડવા લાયક.
જિંદગાની ધકેલપંચાની,
શેષ ક્યાં છે ધકેલવા લાયક.?
-અશોક વાવડીયા
*ભૂ = ભૂમિ, પૃથ્વી, જમીન, ધરા, ધરતી.
