આકાશ પાતાળ તું ધર અંબર નાગ સુરંગર પાય નમે,
દિગપાલ ડગમ્બર, આઠહી ડુંગર, સાતહી સાયર તેણ સમે...
નવનાથ અને નર ચોસઠ નારીએ હાથ પસારીએ તેમ હરી,
રવરાય રવેચીએ, જ્ગ્ગ પ્રમેસીએ વક્કળ વેસીએ ઇસવરી...
દેવી વક્કળ વેસીએ ઇસવરી,
માડી વક્કળ વેસીએ ઇસવરી.
જ્યોતે પ્રળંબા, જુગ્દમ્બા, આદ્ય અંબા ઇસરી,
વદનં ઝળંબા, ચંદ બંબા, તેજ તમ્બા તું ખરી...
હોતે અથાકં, બીર હાકં, બજે ડાકં બમ્મણી,
જગમાંય પરચો દીઠ જાહેર રાસ આવડ રમ્મણી...
ભેરવે હલ્લા, ભલ્લ ભલ્લાં ખાગ ઝાલ્લાં ખેલિયં,
હોતે હમલ્લાં, હાક હલ્લાં, ઝુઝ મલ્લાં ઝેલ્લીયં...
ગાજે તબલ્લાં, બીર ગલ્લાં, ખેણ ટલ્લાં ખમ્મણી,
જગમાંય પરચો દીઠ જાહેર રાસ આવડ રમ્મણી...
