કોઈને જૂઓ...
અને તમારી અંદર રંગોલી પૂરાઈ જાય..
ત્યારે સમજવું કે
આજે દિવાળી છે...
સાવ સૂરસૂરિયા જેવા અસ્તિત્વને લઈને ફરતા હો
અને અચાનક કોઈનો ઉષ્ણ શ્વાસ અડી જતામાં
તમે આખે આખા ફૂટી જાવ
ત્યારે સમજવું કે
આજે દિવાળી છે...
વૃક્ષમાંથી લાકડું થઇને બારણું બની ગયેલા
તમારા સમયને કોઈની નજરનું લીલું તોરણ બંધાય...
ત્યારે સમજવું કે
આજે દિવાળી છે...
જમણો હાથ ડાબા હાથને પણ ન કળી શકે
એવા ગાઢ અંધારમાં તમે બેઠા હો અને તમારા સાવ અંદરના ઓરડે આવીને કોઈ દીવડો જલાવી જાય
ત્યારે સમજવું કે
આજે દિવાળી છે...
