એક દીકરીને ચકલી કહેવામાં કોઈ વાંધો છે નહીં...
પણ, આપણા ઘરની વહુ પણ એક ચકલી જ છે ને !
આવી હોય ત્યારથી ફફડતી અને ડરતી...
હળવા પગલે ચકલીની જેમ ઠેસ ખાતી..
એ આપણા ઘરની વહુ પણ એક ચકલી જ છે ને!
અરીસામાં જોઈ મનોમંથન કરતી..
પોતાના પ્રતિબિંબ સામે હસતી - હસાવતી
એ આપણા ઘરની વહુ પણ એક ચકલી જ છે ને!
એક દાણા જેટલું અમથું ખાઈ પીને..
બધા માટે જહેમત ઉઠાવતી ને સૌને સાચવતી
એ આપણા ઘરની વહુ પણ એક ચકલી જ છે ને!
એક એક ડગલે સાથ ને હાથ આપતી...
બધા સાથે મળીને માળો સજાવતી
એ આપણા ઘરની વહુ પણ એક ચકલી જ છે ને!
આંગણામાં એ જ્યારે રંગોળી પૂરતી...
ચકલીની જેમ સ્નેહનાં રંગોમાં આળોટતી
એ આપણા ઘરની વહુ પણ એક ચકલી જ છે ને!
-શિતલ માલાણી
