મારે જોઈએ છે આઝાદી,
આ જુઠા સંબંધોમાંથી,
જે જરૂર પડે કામમાં નથી આવતાં.
મારે જોઈએ છે આઝાદી,
આ જુઠા રીતિ-રિવાજોમાથી,
જ્યાં એનાં નામ પર લોકોનાં સપનાં પર રોક લાગે છે.
મારે જોઈએ છે આઝાદી,
આ જુઠા હાસ્યમાંથી,
જે મને ઝેર કરતાં પણ વધારે કડવું લાગે છે.
મારે જોઈએ છે આઝાદી,
આ જુઠા સગપણમાંથી,
જ્યાં દરેકને ખુશ રાખવા,
મારે મારી ખુશીઓને નજરઅંદાજ કરવી પડે છે.
મારે જોઈએ છે આઝાદી,
આ જુઠા પ્રેમમાંથી
જ્યાં ડગલેને પગલે મારો પ્રેમ સાબિત કરવો પડે છે.
મારે જોઈએ છે આઝાદી,
આ ભ્રષ્ટાચારથી ખદબદતા સમાજથી,
જ્યાં ઈમાનદાર જીવતેજીવ મરી જાય છે,
આને ભ્રષ્ટાચારીઓ મેવા મલાઈ ખાય છે.
મારે જોઈએ છે આઝાદી,
આ ખોખલી શિક્ષણ પદ્ધતિથી,
જ્યાં તમારી પરિક્ષાના ગુણ જોવાય છે,
એની પાછળની મહેનત નથી જોવાતી.
મારે જોઈએ છે આઝાદી,
આ જુઠા જગતમાંથી.
- વૈશાલી પરમાર
