સક્ષમ હોવાનો અર્થ તાકાતવર હોવું કે શક્તિનું પ્રદર્શન કરવું એવો નથી. પોતાની પાસે વધુ મિલકત છે એટલે હું વધારે સક્ષમ છું એવો વહેમ ન રાખવો. જ્યારે જીવનની અંતિમ ક્ષણો ગણાતી હોય છે ને ત્યારે કોઈ મિલકત તમને બચાવી શકતી નથી. ગમે એટલા તાકાતવાન હોઈએ ક્યારેક તો શક્તિ ક્ષીણ થવાની જ છે.
સક્ષમ હોવું એટલે કે ગમે તેવી પરિસ્થિતી સામે હોય એનો સામનો કરવાની ક્ષમતા હોવી. પોતાના પર કે ઘરનાં કોઈ સભ્ય પર અચાનક જ કોઈ મુસીબત આવી જાય તો કેવી રીતે એમાંથી બહાર નીકળો એ તમારી સક્ષમ હોવાની સાબિતી આપે છે. જો તમે ગભરાઈને કંઈ જ ન કરી શકો તો તમે સક્ષમ નથી.
જો કોઈ જરૂરિયાતવાળી વ્યક્તિને મદદ કરી શકવા સક્ષમ હોય તો કરો. ભગવાને દરેકને એટલા સક્ષમ તો બનાવ્યા જ છે કે અમુક હદ સુધી અન્યને મદદ કરી શકો.
પોતાને જ એટલા સક્ષમ બનાવો કે બીજા માટે તમે એક પ્રેરણાત્મક ઉદાહરણ બની જાઓ અને એ વ્યક્તિ પણ પોતાને સક્ષમ બનાવી શકે. એટલા સક્ષમ બનો, એટલી મહેનત કરો કે પોતાના બાળકોને કોઈ બીજાનું ઉદાહરણ ન આપવું પડે.
આજકાલ જે સ્ત્રીઓ અને નાની છોકરીઓ પર થતા હુમલાની વાતો સાંભળીએ છીએ એ જોતાં એટલું તો સ્પષ્ટ જ છે કે તમે દીકરીને કંઈ ન આપો તો ચાલશે પણ એટલી તો સક્ષમ બનાવો જ કે પોતાનું રક્ષણ કરી શકે. એટલી ભણાવો અથવા તો કોઈ એવું કૌશલ્ય એનામાં શોધી કાઢો કે જેથી એ પોતાના પગ પર ઊભી રહે. કોઈ એનાં પર અત્યાચાર કરવાની કોશિશ પણ કરે તો પાછો પડે. પોતાના ઘરમાં આર્થિક મદદ કરવા પણ એ સક્ષમ હોય.
પોતાની વિચારશક્તિ એટલી સક્ષમ બનાવો કે તમે જે ઈચ્છો છો તે મેળવી શકો. દરેક વસ્તુ પૈસાથી ખરીદી શકાતી નથી. કોઈ સ્થાન પર તમને ઉચ્ચ પદ ત્યારે જ મળે છે જ્યારે તમે એટલા સક્ષમ હોવ, નહીં કે તમે ખૂબ શ્રીમંત છો એટલે એ પદને લાયક છો.
#સક્ષમ
