યાદ આવ્યો પોરનો વરસાદ,આ વરસાદ માં.
ભીંજવે છે ઓણ એની યાદ,આ વરસાદ માં.
કો'ગુલાબી ગાલ ના ખંજન મહી બે બૂંદ હોય!
આપણે મન એ જ તો પરસાદ,આ વરસાદ માં.
સાવ સુક્કી હસ્તરેખા માં નદી જાગે અને,
કોઇ ભીતરથી કરે છે સાદ,આ વરસાદ માં.
રોજ અમને ઘર સુધી મૂકી ગયો વરસાદ તો,
બેઉ છોડી ના શક્યા મરજાદ આ વરસાદ માં.
બૂંદ થઇ મારો જ પડછાયો મને વળગી પડે,
કેવી રીતે સાચવું ઉન્માદ?આ વરસાદ માં.
પોતપોતાનો જુદો વરસાદ લઇ આવ્યા છે સૌ,
કોઇ છે આબાદ,કોઇ બરબાદ, આ વરસાદ માં.
સાવ હળવા ફૂલ જેવું થઇ જવાતું હોય છે,
જાતમાંથી કોણ થાતું બાદ? આ વરસાદ મા
હા,ઉનાળે રોજ ગાશે "આવ રે વરસાદ", પણ,
એજ લોકો ની હશે ફરિયાદ, આ વરસાદમાં.
