#માળો
શહેરના નવા વિકસતા વિસ્તારમાં નવો બંગલો ખરીદેલો આસ્થાએ. બાજુમાં જ એક મોટો પ્લોટ ખુલ્લો હતો. એ પ્લોટમાં ઘણાં ઝાડ હતાં અને ઝાડ પરનાં માળામાં અનેક પક્ષીઓ રહેતા હતા. પક્ષીઓના કલરવથી જ આસ્થાની સવાર પડતી. ઘરમાં મોટો ડાઈનીંગ હોલ હતો. પણ સવાર અને સાંજની ચા તો તે ઓટલા ઉપર જ પીતી. સવારની ચા માળામાંથી જતા પક્ષીઓને જોઈને અને સાંજની ચા માળામાં આવતા પક્ષીઓને જોઈને પીવાતી . પ્લોટ ના પગીએ કહેલું કે બે ભાઈઓને વારસામાં મળેલી આ જમીન છે. પણ બંને વચ્ચે જમીનની વહેંચણીને લઈને વિવાદ છે. કોર્ટમાં કેસ ચાલે છે. કોર્ટ કેસનો નિકાલ આવી જશે તો આ જમીન વેચાઈ ને અહીંયા મોલ બનશે. ખબર નહી કેમ પહેલી વાર આસ્થાને થયું કે આ કોર્ટ કેસનો નિકાલ ક્યારેય ન આવે?
