નીંદરરાણીને!
આજ તો જરા આંખનાં મારા ઉંબરે આવી બેસ,
રોજની પેઠે દોડતી આવી કિકીઓમાં ના પેસ,
નીંદરરાણી રે !...
છેતરાવું નથી આજ હવે કૈઁ,
નૂપુરના તારા શાંત રવેથી,
ખોટા ખોટા તું તો રોજ દેખાડે, સપનાંઓ ના દેશ,
નીંદરરાણી રે !...
પોપચાં કેરા પડદા ઢાળી,
ઢાંકી દેતી તું તો કીકીઓ કાળી,
નથી દીઠા તેથી કોઈ દિ તારા, કામણગારા વેશ,
નીંદરરાણી રે !...
નથી કદી કરી વહાલથી વાતો,
ઘેનમાં તારા વીતતી રાતો,
આજ નહિં લોભાઉં રે તારી, લાલચમાં લવલેશ.
નીંદરરાણી રે !...
---મીનપિયાસી
#meenpiyasipoetry
