? ચકી ચકી પાણી પી જા...?
ચકી ચકી પાણી પી જા,
બે પૈસાનો બરફ લઈ જા,
આવું જોડકણું ફરી ગાવું છે,
મારે બચપણમાં પાછું જાવું છે..
રમવું છે મારે પકડા પકડી,
તને ગમે તો સંતાકૂકડી,
આવી રમતો ફરી રમવી છે,
મારે બચપણમાં પાછું જાવું છે..
અંચાઈ કરીશ તો તારી કિટ્ટી,
ચાલ ખવડાવ હવે પીપર મીઠી,
ખોટું મોઢું ચડાવી ફરવું છે,
મારે બચપણમાં પાછું જાવું છે..
ઝાડવે ચડીને બેસી જઈએ,
તોડી આંબલી કાતરા ખાઈએ,
ફરી ગલુડિયું જાડું રમાડવું છે,
મારે બચપણમાં પાછું જાવું છે..
એ બહેન મારી, હું ભાઈ એનો,
વચ્ચે જે આવે, મરો થશે એનો,
વિશ્વ-યુદ્ધ શેરીમાં લડવું છે,
મારે બચપણમાં પાછું જાવું છે..
માચીસના ફોનથી હેલ્લો હેલ્લો,
ગાડી, વિમાન જોઈ ઘેલો ઘેલો,
આવું નિર્દોષ થઈને ફરવું છે,
મારે બચપણમાં પાછું જાવું છે..
- કાજલ શાહ
