' ચાલને સખી.....આજે પતંગ થઈ જઈએ '
ચાલને સખી...
આજે
પતંગ થઈ જઈએ
દરદ સઘળા ભૂલી..હળવા થઈ
ઊંચે આભમાં ઊડી જઈએ
ચાલને સખી....!!
સુરજને સન્મુખ રહીએ
ને.....
પછી પેચ લડાવીએ
રસાકસીમાં ઢીલ મુકીએ
ભાર નહીં....
પ્યારથી પેચ લડાવીએ
ચાલને સખી....!!
ક્યારેક....તું દોરી
અને... હું કિન્ના થઇને
પવન ની લહેરખીએ
ઠુમકા લગાવીએ
ઉર્મિઓ સઘળી ને
વાચા આપીને
લપેટ લપેટનો સાદ પાડીએ
ચાલને સખી....!!
કાચ પાયેલ લાગણી ને
જાકારો આપીને
હૈયાના ઘાવ ને
સ્નેહનો લેપ લગાડીએ
સુરજ આથમ્યા બાદ
પણ આભમાં ટકી રહીએ
કંડીલ બની
આપણો ઉજાસ
ચોમેર પાથરીએ
ચાલને સખી....!!
