ગીત

હું તો મનમાં ને મનમાં રે મ્હાલું !
ખુશીઓથી ખળખળતા ઝરણાંના ઝાંઝર હું પહેરીને મદમાતી હાલું,
હું તો મનમાં ને મનમાં રે મ્હાલું !

ફરફરતા પીંછા સંગાથ જઈ આકાશે
જીવતરની દોરું રંગોળી,
રંગોને યાદ કરું એટલામાં આવી પહોંચે
પતંગિયાની ટોળી,
તરસ્યા જે હોય એવા વાદળની વચ્ચે પણ
નખરાળી ચાલે હું ચાલું,
હું તો મનમાં ને મનમાં રે મ્હાલું !

શ્વાસના કમખા પર બાંધું છું મોજ અને
મસ્તીના પચરંગી ફૂમતા,
અણિયાળી આંખડીના મોઘમ ઈશારે
લાગણીના અવસર છે ઝૂમતા,
હૈયે ભાતીગળ ભરાય રોજ મેળો તો
ખુદને હું કેમ કરી ઝાલું ?
હું તો મનમાં ને મનમાં રે મ્હાલું.

જિજ્ઞા ત્રિવેદી

Gujarati Song by Jigna Trivedi : 111068938

The best sellers write on Matrubharti, do you?

Start Writing Now