કંઈક કષ્ટ છે એ વાત ગોળગોળ ન કર
જે કહેવું હોય તે કહી નાખ, ચોળચોળ ન કર
છે સ્તબ્ધ સાંજ, તું બારી સમીપ ઊભી છે
સજળ છે આંખ ને હસવાનો આમ ડોળ ન કર
પીડા જો નગ્ન રહેશે તો કુદરતી રહેશે
તું કોઈ વસ્ત્ર એને માટે ખોળખોળ ન કર
રહેશે એ જ વજન, એ જ વલણ, એ જ ચમક
મનુષ્યને તું ત્રાજવામાં તોળતોળ ન કર
ભીનું રહસ્ય હતું, આંખથી ન સચવાયું
તું વ્યર્થ ઢાંકપિછોડો, અરે કપોળ ! ન કર
બધી વસંત કાંઈ નમણી નથી હોતી,
બધી વસંતમાં તું જીવ ઓળઘોળ ન કર.
