જેણે ઉલેચ્યા અજ્ઞાન અંધકાર તે શિક્ષકને વંદન.
જેણે પાથર્યા પ્રકાશ પારાવાર તે શિક્ષકને વંદન.
વિદ્યારૂપી જ્ઞાન જેના સાનિધ્યમાં સાંપડ્યું સહેજે,
જેણે રોપ્યા જીવનમાં સંસ્કાર તે શિક્ષકને વંદન.
કરી દૂર કુટેવો હતી જે ડગલેપગલે દેખાતી એને,
જેણે સદગુણો દીધા વારંવાર તે શિક્ષકને વંદન.
સ્થાન બીજું માતાપિતા પછીનું હોય જેનું સદાએ,
જેણે ચીંધ્યા સમાજના આચાર તે શિક્ષકને વંદન.
શિક્ષકદિને સસ્નેહ નમીએ ગુરુસમા એ શિક્ષકોને,
ઈશસ્વરુપ ભલેને મનુજ આકાર તે શિક્ષકને વંદન.
- ચૈતન્ય જોષી. ' દીપક ' પોરબંદર.
