एका बाबानं लेकीसाठी लिहिलेली कविता..
बाबानेही वाचावी अनं लेकीनेही!
गोड माझी परी..!
देवाच्या घरून एवढ्या दुरून
आली माझ्या घरी, गोड माझी परी..!
हृदयाचे स्पंदन ती, रेशमाचे बंधन ती,
प्रेमाची भाषा ती, जगण्याची आशा ती..
पाणावले डोळे आज, पापण्यांच्या तिरी
आली माझ्या घरी.. गोड माझी परी...!
बोबड्या बोलांनी, निनादले माझे घर
पावलांच्या गुंत्यात, जीव झाला खालीवर
घोडा करून बाबाचा, स्वारी खूष पाठीवरी
आली माझ्या घरी.. गोड माझी परी...!
शाळेतील पहिला दिवस तिचा..
काळजीनं बाबाचा जीव वेडापिसा
हुरहूर मनाला जरी, टाटा-बाय ती करी..
आली माझ्या घरी.. गोड माझी परी...!
बाबा तुम्ही कुठे आहात ?
तुम्ही या ना घरी लवकर
अस तिचं फोनवरचं लाडिक बोलणं,
बाबाला घायाळ करी..
फोन करून ती घेई काळजाचा ठाव..
मग बाबाच्या मनाची होई धावाधाव
आईपेक्षा बाबावर लळा ती करी..
आली माझ्या घरी.. गोड माझी परी..!
हळू हळू वाढे ही चंद्राची कोरं
नटण्या मुरडण्याची हौस तिला भारी
हट्ट पुरवे बाबा तिचा आपल्या परी
आली माझ्या घरी.. गोड माझी परी..!
हळू-हळू दिवस गेले भुर्र उडून
स्थळ आलं तिला कुणा आप्ताकडून
काळजात झालं चर्रर्र..
पिल्लू जाईल आता दुसऱ्या घरी..
आली माझ्या घरी.. गोड माझी परी..!
लेक म्हणजे शेवटी दुसऱ्या घरचं लेणं
शिकायला हवं आता तिच्याविना जिणं
सुखरूप लाव देवा तिची नावं पैलतीरी..
आली माझ्या घरी.. गोड माझी परी..!
लेक सासरी निघून गेली..
परी बाबाच्या हृदयातच आहे.
बाबा म्हणतो...
राहशील सदा परी तू माझ्या परीकथेत
येईल ओल पापण्यांना तुला..
बाबाच्या या व्यथेत..!
तुझ्या गुंतल्या जगात घेशील का उसंत जराशी..
बाबाच्या आठवणी तू कवटाळशील का उराशी.!
राज्य तुझे असेल सदा माझ्या हृदयावरी..
गेलीस सासरी जरी तू रहाशील सदा अंतरी..!
आली माझ्या घरी.. गोड माझी परी...!!
-प्रदीप धयाळकर✍️
