તો...તો...જાણું મનવા..!
નામ વગરનો નાતો લઈને જીવે તો તો જાણું મનવા,
ઘટકે ઘટકે ઉદાસી તું પીવે
તો તો જાણું મનવા !...
ભીતર જાગે પૂર્વજન્મ ને જાદૂ ફરકે રુંવે રુંવે,
અવઢવ ફરકે હોઠો વચ્ચે અટકળ વચ્ચે આંખોચૂવે
અંધારામાં ભાળે વગર દીવે તો તો જાણું મનવા,
ઘટકે ઘટકે ઉદાસી તું પીવે તો તો જાણું મનવા.....!
પંથક ઊભો ટોણાં મારે એની ક્યાં કંઈ રીસ ચડેલી ?
મૌન પણાંના ઉઝરડાની ભીતર જબરી ચીસ પડેલી.
ઝબકી જઈને મેળામાં પણ બીવે તો તો જાણું મનવા ...
ઘટકે ઘટકે ઉદાસી તું પીવે તો તો જાણું મનવા....!
નામ વગરનો નાતો ઊગે પ્રગટે વચ્ચે અંજળપાણી
ઈશ્વર તારી લીલા ન્યારી કોની દોરી ક્યાંથી તાણી ?
આવરદાને બખિયેબખિયે સીવે તો તો જાણું મનવા
ઘટકે ઘટકે ઉદાસી તું પીવે તો તો જાણું મનવા....!
@નૈષધ મકવાણા.
