પુરુષ દિવસ વિશેષ..
● મરદની વિધાતાને અરજ..●
મૂછોનાં અંકોડે,
મર્દાનગી પેરવી કરે !
ભરાવદાર દાઢી નીચે,
એક દમદાર હૈયું પણ વસે !
બાળપણમાં,
છેક પોપચે આવેલાં આંસૂઓને,
વડીલોએ મરદમાં ખપાવી,
દબાવી દીધેલાં !
ત્યાંથી લગી ઘડપણ સુધી,
ખભાને દુઃખ ઉપાડતો કર્યો !
ને ડૂમાઓને સંઘરીને,
ભીતરમાં અંબાર કર્યો !
ખોંખારા ખાઈ ખાઈને,
પ્રેમની ભાષાને પોકારતો રહ્યો !
પણ રૂક્ષતાની આડશમાં,
સૌથી અવગણાતો રહ્યો !
ક્યારેક ભાઈ, ક્યારેક બાપ,
ક્યારેક દાદો તો ક્યારેક સેઢાનો સાપ !
ફૂંફાડા મારીને રખોપા કરનારને,
ક્યારેક નૂગરો તો ક્યારેક ઝેરીલો કહેવાયો !
પુરુષના પ્રાગટયે,
વિધાતાને નમ્ર અરજ છે,
જાહેરમાં,
આંસૂ સારવાનો ને ,
ડૂમાં બાંધવાનો,
અમને પણ એક અવસર દે !
- વિશાલ દંતાણી ( 19/11/2020)
