હ્રદયમાં વ્યથાની કસોટી થવાની.
દરદમાં દવાની કસોટી થવાની.
કે જીદે ચડ્યો છે અહીં એક દીવો,
તો નક્કી હવાની કસોટી થવાની.
મહોબત નથી ખેલ કઇ બાળકોનો,
પ્રણયમાં વફાની કસોટી થવાની.
મદદ આવશે જો તું સાચો હશે ને,
જીવનમાં બધાની કસોટી થવાની.
ભલે વોટ આપીને ચૂંટે એ નેતા,
છતાં પણ પ્રજાની કસોટી થવાની.
મુલાકાત થાશેને તો બાથ ભરશું,
મળે ત્યાં કઝાની કસોટી થવાની.
'કમલ' એમ સ્ફૂરે ના ગઝલો પરાણે,
નવા છો? નવાની કસોટી થવાની.
કમલ પાલનપુરી
