આપી દેવી જાન માદર-એ-વતન માટે, સહેલું નથી,
હોમી દેવું માંગનું સિંદૂર આ વતન માટે, સહેલું નથી.
શહીદના સ્મારક રૂપી બાવલાને હેતથી રક્ષા બાંધી,
રક્ષા કરતા વીરને આપવો વતન માટે, સહેલું નથી.
એક બુઢ્ઢો બાપ આપતો હતો ત્યારે એ આભને ટેકો,
ઉપાડવો જનાજો દીકરાનો વતન માટે, સહેલું નથી.
નવ નવ મહિનાની પીડા સહીને અવતરણ કરાવ્યું,
ભાલે કરી ચાંદલો મોકલવો વતન માટે, સહેલું નથી.
એ જન્મી હતી ત્યારે એમના પિતા હતા સરહદ પર,
પિતૃત્વ કરવું એમ જ કુરબાન વતન માટે સહેલું નથી.
"મનોજ" એ પરિવારનું પુણ્ય પણ સાત પેઢીનું હશે,
બાકી એમ જ ખપી જઉં આ વતન માટે, સહેલું નથી.
મનોજ સંતોકી માનસ
#સહેલું
