હવે તો ઉર પણ દ્રવીભૂત થૈ ઊઠ્યું હરિ આવોને.
હવે હૃદય પણ હચમચીને તરફડ્યું હરિ આવોને.
હૈયે થઈ ગઈ અંકિત આશ તવ દર્શનની હરિવર,
અંતર પણ અવિનાશી પરોવાઈ ગયું હરિ આવોને.
શરણ તારું સર્વેશ્વર સૌથી પ્યારું અંતરયામી પ્રભુ,
વરસી વરસી અશ્રુ પણ સૂકાઈ ગયું હરિ આવોને.
ભૂલી ભગવંત અવગુણ મારા કૃપા વરસાવો તમે,
નામસ્મરણે ઉર ધબકારે વણાઈ ગયું હરિ આવોને.
કરુણા તારી કરુણાનિધિ પ્રગટાવજો પરમેશ તમે,
તારા વિયોગે સઘળું મને ભૂલાઈ ગયું હરિ આવોને.
ચૈતન્ય જોષી. " દીપક " પોરબંદર.
