આકાશે ઉગ્યો છે રંગ-ઉત્તરાયણ....
Song written By Me For Guj. Govt. Kite Festival..
આકાશે ઉગ્યો છે રંગ ,
હૈયામાં ઉછળે ઉમઁગ,
આકાશી ઉત્સવ છે આવ્યો,
પતંગને માંજો છે લાવ્યો.
ચરરરર કરતી ચીલ ચગી છે,
પાવલા સાથે ઢીલ લડી છે,
ઢાલ કહે મને કોઈના કાપે,
ગેંશીયો ત્યાંજ ગોથ છે મારે,
લકડે-ચોપાટ વાત કરે છે,
ફુદ્દી આજે બહુ નડે છે,
ચાંદદાર આકાશે આંબે,
સાથ દેવા ત્યાં પહોંચ્યો આંખે,
આકાશે ઉગ્યો છે રંગ ,
હૈયામાં ઉછળે ઉમઁગ,
આકાશી ઉત્સવ છે આવ્યો,
પતંગને માંજો છે લાવ્યો.
અડતાની સાથે કપાણો
સુરતી છે માંજો મારો,
પતંગ આ કોનો લપટાણો,
ઝોલ મારે છે તારો,
અત્તમતાણી કાપમકાપી,
ધાબા પરથી બૂમો પડતી,
એ લપેટ… એ કાડે…
પવન સૌને રમત રમાડે,
પતંગ કેરા પેચની સાથે આંખો નાંખે લંગશ આજે,
લાગણીઓની ગુચ્ચમ ખુલતી,પ્રેમની ટુકકલ ચડતી સાંજે,
આકાશે ઉગ્યો છે રંગ ,
હૈયામાં ઉછળે ઉમઁગ,
આકાશી ઉત્સવ છે આવ્યો,
પતંગને માંજો છે લાવ્યો.
ફીરકી છે સઁસ્કાર આપણાં,માંજો છે માં બાપ,
આકાશે આંબો ભલે ફિરકીને માંજાનું બઁધન તું રાખ
જીવનમઁત્ર કહે છે પતંગ હૈયામાં ઉછળે ઉમઁગ.
આકાશે ઉગ્યો છે રંગ હૈયામાં ઉછળે ઉમઁગ,
આકાશી ઉત્સવ છે આવ્યો,
પતંગને માંજો છે લાવ્યો.
