ઈચ્છાઓ કેરી ફોરવર્ડ થાય છે
વજન ઘટાડવાની અધૂરી ઈચ્છાથી લઈને કોઈ ગમતા પાત્ર સાથે સમય પસાર કરવાની ઝંખનાઓ સાથે ગયુ વર્ષ પૂરું થયું. થેન્ક ગોડ ! આ વર્ષમાં જેટલું ઈચ્છ્યું, એ બધું પૂરું નથી થયું. એટલું સારું છે કે ઈચ્છાઓ કેરી ફોરવર્ડ કરવા માટે કેલેન્ડરની સ્પેશીયલ પરમીશન નથી જોઈતી.
આ અધૂરપ, આ અપૂર્ણતા નવા કેલેન્ડર વર્ષમાં પણ આપણી સાથે રહેશે. સપનાઓ પૂરા થશે કે નહિ, એ તો ખબર નથી પણ સપનાઓ પૂરા કરવાની ઈચ્છા આપણી સાથે નવા વર્ષમાં પ્રવેશે, તો નવું વર્ષ મંગલમય જ હોય.
જે ક્ષણે બધું જ મળી જશે, એ ક્ષણ કેટલી ભયાનક હશે ? ત્યારે કશુંક પામી ગયાનો સંતોષ હશે કે હવે કશું જ પામવાનું નથી, એ વાતનો ખાલીપો ? સારું છે કે સપનાઓ જલદી પૂરા નથી થતા. કશુંક અધૂરું રહી ગયાની ભાવના જ જીવવા માટેનું બળ પૂરું પાડ્યા કરતી હશે. અધૂરી રહી ગયેલી ઈચ્છાઓ લાંબો સમય જીવાડતી હોય છે.
જ્યાં સુધી ગૂગલ મેપ લઈને ભટક્યા કરીએ છીએ, ત્યાં સુધી જ સફરની મજા છે. જે ક્ષણે મંજિલ મળી જશે, એ ક્ષણે બધો જ રોમાંચ ઓસરી જવાનો છે. ઈચ્છાઓ પૂરી થવાની આશા ઈચ્છાઓ પૂરી થવા કરતા વધુ શક્તિશાળી હોય છે. થેન્ક ગોડ ! ઈચ્છાઓ કેરી ફોરવર્ડ થાય છે.
