यक्षरात्री म्हणूनिया, हीचा हो लौकिक
याच उत्सवाचे, मनामनात कौतुक!!
तेजाळले दीप, आनंदजल प्रवाही!
पाच दिसांची दिवाळी, आहे अर्थवाही!!
वसुबारसेची संध्या, कृषीवलांचा उत्सव
गाय वासराच्या प्रती, धन्याचा स्नेहभाव!!
धनत्रयोदशी सजली, धनांच्या राशीने
अलांछन व्यापार, करू निर्मळ मनाने!!
असुराचा वध करूनी, गेला हो श्रीकृष्ण
स्रीजातीच्या उद्धाराचे, त्याच्या मनी होते भान!!
लक्ष्मीचे पूजन ,गृहलक्ष्मी आत्मतृप्त!
दोघींच्याही हास्यातून, येई घरात आनंद!!
वामन अवतारे केला, गर्वनाश बळीचा!
दिवस साजिरा ,पती पत्नीच्या प्रेमाचा!!
आली भाऊबीज, भावा बहिणीची प्रीत
वात्सल्याला आदराची ,जोडूनिया रीत!!
कंदील दाराशी, झुलतो सांजेला
मंगलाला हाक देतो, आतुर संध्येला!!
गंधित उटणे, सुशोभित करी अंग!
शरीर मनाचे ,शुद्ध होई अंतरंग!!
फटाक्यांनी भरले , आकाश साजिरे!
बालगोपाळांच्या हास्ये, क्षण आनंदाने भरे!!
अशी ही दिवाळी आनंद हर्ष मोद
ईशाच्या कृपेने आशीर्वाद होवो प्राप्त!!
डाॅ.आर्या जोशी
