મારે પણ એકવાર રીટર્ન ફાઈલ કરવું છે (કાવ્ય)
કશું સંતાડવું નથી,
જેટલો હોય એટલો બધો ટેક્સ ભરવો છે.
દોસ્ત, ગયા વર્ષની મારી ઈન્કમમાં
મારે તમને જાહેર કરવો છે.
તમારી કંપની લક્ઝરી છે.
એના પર લક્ઝરી ટેક્સ ચોક્કસ લાગશે.
તમે મારા છો એની સાબિતી રુપે,
આ લોકો કેટલા ડોક્યુમેન્ટ્સ માંગશે ?
ખિસ્સાઓ સાવ ખાલી હોય અને
છતાં કોઈની જાહોજલાલી હોય.
આવો ભાગ્યે જ કોઈ અપવાદ મળશે.
તમારી ભાઈબંધી બહુ મોંઘી છે યાર.
એના પર લોન લઈ લઉં તો
એનું વ્યાજ મને ટેક્સમાંથી બાદ મળશે ?
તમારી હાજરી બહુ Obvious છે યાર.
તમારા કારણે કેટલાયની નજરોમાં આવું છું.
એક તમારા નામને કારણે,
હું ૩૦ %ના સ્લેબમાં આવું છું.
તમે આપેલી મોંઘીદાટ ક્ષણો
હવે ચોપડે ચડાવવી છે,
જિંદગી પાસેથી
તમારા નામની એક રસીદ ફડાવવી છે.
તમારા માટેનો સમય
જો હું બીજા કોઈને ન આપું,
તો એને કરચોરી કહેવાય ?
મારું ચાલે તો તમને ગજવામાં સંતાડી દઉં.
પણ તમેજ કહો, સરકારને થોડું સોરી કહેવાય ?
તમારી હાજરીના માનમાં,
જીવતરના દુઃખ સામે જોઈને
થોડું સ્માઈલ કરવું છે.
દોસ્ત, મિલ્કતના નામે જો તમે હો ને
તો મારે પણ એકવાર રીટર્ન ફાઈલ કરવું છે.
- ડૉ. નિમિત્ત ઓઝા
