૨૦
ગઝલ ( દીવાનગી જ સત્યનો )
દીવાનગી જ સત્યનો સાચો પ્રચાર છે,
જાણી ગયા બધાં કે મને તુજથી પ્યાર છે.
શોધો પ્રસંગને એ તમારા ઉપર રહ્યું,
આખું જીવન અમારું હવે આવકાર છે.
મળવા જો એને ચાહું તો હમણાં મળી શકું,
એ વાત છે જુદી કે મને ઇન્તિઝાર છે.
આંખોમાં મારી આજ સફેદી છવાઈ ગઈ,
ઓ વિરહ રાત, તારી અનોખી સવાર છે.
શું સંકલન શું એકતા છે વાહ, વાહ, વાહ,
એ પણ શરાબ છે જે નશાનો ઉતાર છે.
શું એમાં દર્દ છે તે અમુક જાણતા હશે,
છે હાથ મારા તંગ અને દિલ ઉદાર છે.
એકાદ હો તો એને છુપાવી શકું ‘મરીઝ’,
આ પ્રેમ છે ને એના પુરાવા હજાર છે.
- મરીઝ
