અંધારામાં અથડાવું અમને હવે નથી ગમતું.
ક્ષણિક પ્રકાશપુંજ સારુ કરગરવું નથી ગમતું.
મળી ગઈ એકાદ ટશર ;શું બની ગયા બાદશાહ?
જ્યોત ઝગમગ કાજે શિર ધરવું નથી ગમતું.
તમારી સઘળી સંપદા તમને મુબારક હો સદા,
સ્વમાન નેવે મૂકીને પછી ડગ ભરવું નથી ગમતું.
એક જ માપદંડ પૈસાનો તમે ભલા રાખી બેઠા!
અંતરે અગન છૂપાવી મધુવેણ ઉચ્ચરવું નથી ગમતું.
આમ તો માનવતાવાદી રહ્યું વલણ મારું સમજો,
તેથી જ કોઈની સાહ્યબી સામે ઝૂકવું નથી ગમતું.
- ચૈતન્ય જોષી. ' દીપક ' પોરબંદર.
