મ્યાનમાં નાખી અમે - તેં એ ગઝલ વાંચી નથી,
ઘા ઉપર ઢાંકી અમે - તેં એ ગઝલ વાંચી નથી,
જિંદગીના ખૂબ કડવા સ્વાદને બદલાવવા,
મોજથી ફાકી અમે - તેં એ ગઝલ વાંચી નથી.
જે તને... કેવળ તને વંચાવવા લખતાં રહ્યા,
જિંદગી આખી અમે - તેં એ ગઝલ વાંચી નથી.
સાવ ઝાંખા અક્ષરોમાં રાતનાં પાનાં ઉપર,
સૂર્યની વાંચી અમે - તેં એ ગઝલ વાંચી નથી.
એક ડૂમાને ગળાની કેદથી છોડાવવા,
બાનમાં રાખી અમે - તેં એ ગઝલ વાંચી નથી.
ખૂબ - હકડેઠઠ પીડાઓ ભરી હોવાં છતાં,
જે હસી કાઢી અમે - તેં એ ગઝલ વાંચી નથી.
રોજ ભોગળ જેમ - યાદોનાં કટકને રોકવા,
સાંજ પર વાખી અમે - તેં એ ગઝલ વાંચી નથી.
-હર્ષા દવે.
#Womens_week
-Kinar Rana