*ગઝલઃ ‘મમતા’*
*છંદ:* _મુઝારિઅ મુસમ્મન અખરબ_
*ગણસ્વરૂપ:* _ગાગાલ ગાલગાગા ગાગાલ ગાલગાગા_
આભાસ થઈ ગયો’તો ભજતાં રવિ સવારે,
મારાં કવચ - કુંડળ લેશે એ નદી કિનારે.
છે મુજ સ્વભાવ માંગો તે દેવું તો તું લઈજા,
આપો તો એક શક્તિ ના જોઈએ વધારે.
જો વાત હોય મિત્રની તો શિર પણ ધરી દું,
કાયર નથી હું દુશ્મન આવે ભલે હજારે.
રણભૂમિમાં જ સાચા યોદ્ધાના પારખાં થાય,
લોકો ભલેને મુજ પર મેણાંઓ છો ગુજારે.
મમતા જે ઝંખતો પલપલ હું રહ્યો પૃથાની
પોતાના માની સૌને સૂતો હું મા સહારે .
*-- જિતેન્દ્રકુમાર બિ. બિલવાલ*
તા. ૧૧/૧૨/૨૦૨૦
