** કાચની બંગડીઓ *****
સુહાસિની બારીમાં ઊભી હતી. ત્યાં જ તેણે બંગડીઓ વેચવા વાળીનો અવાજ સાંભળ્યો. " લાલ - લીલી, બ્લુ - પીળી રંગબેરંગી કાચની બંગડીઓ...." તેણે નીચે નજર કરી ન કરીને બારી બંધ કરીને બેસી ગઇ.બંગડીવાળી નો અવાજ સાંભળી ફળિયાની બહેનો ફટાફટ બહાર આવી દરેકે પોતાની મન ગમતી બંગડીઓ લીધી.
સુહાસિની તેનો કબાટ ખોલીને ઊભી રહી. ઓ.. હો.. તેની પાસે તો કેટલી બધી બંગડીઓ છે... એમ વિચારતા વિચારતાં જ તેના ગળે ડૂમો ભરાઈ ગયો. અને તેના સૂના હાથ પર તેની નજર ગઇ, તેને સુહાગ ના શબ્દો યાદ આવી ગયા "તારી તો બંગડીઓ પણ તારા જેવું જ મધૂર સંગીત સંભળાવતી હોય એવું લાગે છે" એની આંખોમાં થી અશ્રુ ધારા વહેવા લાગી.
બંગડીવાળીએ પૂછ્યું પેલા સુવાસિની બેન હજુ સુધી બંગડીઓ લેવા કેમ ન આવ્યા. મારો અવાજ સાંભળીને તો તે સૌથી પહેલા દોડતા આવે. આજે ઘરમાં નથી કે શું? એક બહેને તેને જવાબ આપ્યો.," હવે સુહાસિની બેન બંગડીઓ લેવા ક્યારેય નહિ આવે. તેનો સુહાગ તો.....
તેના સાસુ દરવાજામાં જ ઊભા હતા તેમણે આ વાક્ય સાંભળ્યું . અને તેમને તે સમય યાદ આવી ગયો. જયારે સૂરેશ ભાઈના અવસાન પછી એક દિવસ તે કબાટ ગોઠવતી હતી ત્યારે તેના ખાનામાં લાલ - લીલી કાચની બંગડીઓ તેણે જોઈ. એને સહજ ભાવે તેણે તેના સૂના હાથમાં બંગડીઓ પહેરી લીધી. દૂર ઊભેલા તેના સાસુએ તેની નોંધ લીધી. સરિતા બેન નું ધ્યાન તેની સાસુ તરફ ગયું અને તેની ચોરી પકડાઇ ગઇ હોય તેમ તેણે તરત જ બંગડીઓ કાઢીને કબાટ બંધ કરી દીધો. બીજા દિવસે સવારે તે નોકરી એથી આવી ત્યારે તેની સાસુ માગવા વાળી બાઈને લાલ - લીલી કાચની બંગડીઓ આપતા જોયા. તેની આંખો ભીની થઇ. સૂરેશ ભાઈને ગમતી હતી એટલે તો સાચવી હતી. સરિતા બેન તરત જ સુહાસિનીના રૂમમાં દોડી ગયા તેણે જોયું કે સુહાસિનીનો કબાટ ખુલ્લો હતો. બંગડીઓ વેરવિખેર હતી અને સુહાસિની હાથમાં બંગડીઓ લઈને તેનો અવાજ કરતા કરતા રડી રહી હતી.
સરિતા બેને સુહાસિનીના માથા પર હાથ મૂકીને બોલ્યા, " તારો સુહાગ તો આજે પણ તારી સાથે જ છે. આત્મા થી, તેની યાદોથી, તેના શબ્દોથી પણ...
ચાલ, ઊભી થા. તને મન ગમતી બંગડીઓ લઈ આવ. તારા માટે અને મારા માટે પણ...
.......………......…...................................................................................................................
બિંદીયા જાની (તેજબિંદુ)
માધાપર - ભુજ
