#અગ્નિ
"ભડકો નથી અંદર મારી આગ છે
મારામાં ગંગા ને મારામાં જ પ્રયાગ છે"
********
ભીતર ભીતર ભડકે છે,
ને ઉપર ઉપર સળગે છે.
થોડું ઠરતું લાગે ત્યાં,
ભૂત ભારાડી વળગે છે?!
લોહી પાણી એક થઈ,
ધીરે ધીરે ટપકે છે.
થીજવા માટે હામ ભરે,
પણ ટીપે ટીપે અટકે છે.
અંદર અંદર ભેગી થઈ,
મનશા કીડી ચટકે છે.
ફાટી પડું કે વટે ચડું?
બેસી રે'વું ખટકે છે.
ડગલું પગલું માંડ્યું છે,
હાથે માથું ટાંગ્યું છે;
અંધારાના સીમાડે:
દીવો ઝીણો ઝળકે છે...
© લીના પ્રતીશ
