#ઈચ્છાનુવર્તી
("ઇચ્છાનુવર્તી" એટલે " ઇચ્છાનુસાર "માનીને હું મારી ઇચ્છાનુસાર લખીશ .😊)
ચાલીસ વર્ષ શિક્ષિકાની નોકરી કરીને રીટાયર્ડ થયેલા હેમા બા. શિક્ષિકા હતા ત્યારથી જ ઘરમાં પણ નિશાળ જેવી જ જો હુકમી ચલાવતા. પોતાની ઈચ્છાનુસાર વર્તતા અને બીજા પણ પોતાની ઇચ્છાનુસાર વર્તે તેમ ઇચ્છતા. જો કે મોટી વહુ આગળ એમની જો હુકમી ન ચાલી. એટલે નાની વહુ કવિષા પાસે જ રહેતા. કવિષા બિચારી સીધી સાદી હેમા બા ના ઘાંટા સાંભળે. જ્યારે કવિષાના પિયરથી ફોન આવે ત્યારે તો હેમા બા અવશ્ય ઘાંટા પાડે. કવિષાને આ બધુ ન ગમે પણ પોતે હંમેશા એવું માને કે હેમા બાને મોટી વહુ તો રાખતી નથી જો પોતે પણ બા સાથે ખરાબ વર્તન કરે તો હેમા બા ક્યાં જાય ? આમને આમ કવિષા એ પંદર વર્ષ હેમા બા સાથે કાઢી નાખ્યા પણ કહે છે ને કે દરેક વસ્તુનો એક સમય હોય છે. કવિષાના પતિને અચાનક વિદેશ થી સારી જોબની ઓફર આવી અને કવિષા પોતાના પતિ અને બાળકો સાથે વિદેશ ચાલી ગઈ. રહી ગયા તો એકલા હેમા બા. હવે તો કદાચ એમને પોતાની ઈચ્છા અનુસાર ઘાંટા પાડવા હોય તો પણ સાંભળનાર કવિષા ક્યાં ?
