#હૂંફ
નિર્મિત માત્ર પાંચ વર્ષનો હતો ત્યારે કલ્પના માસી એક એક્સીડન્ટમાં મૃત્યુ પામેલ. માસાએ તો એક વર્ષમાં જ બીજા લગ્ન કરી નાખેલ. માસાની નોકરી ફરવાની હતી અને સાથે સાથે પોતાની પત્નીને પણ લઈ જતા. નિર્મિત ને સાથે લઈ જાય તો નિર્મિતનું ભણવાનું બગડે એવા બહાના કાઢી બંને જણાં નિર્મિતને દાદા દાદી પાસે જ રાખતા. આમ નિર્મિતે મમ્મી ની સાથે સાથે પપ્પાની હૂંફ પણ ગુમાવી. કલ્પનાના પિયરિયા નિર્મિતને ચઢાવે છે એવા બહાના કાઢી કાઢીને માસાએ નિર્મિતને પોતાના નાના નાની કે મોસાળની કોઈ પણ વ્યક્તિ સાથે સંબંધ રાખવા દીધેલ નહી. આમ દાદા દાદી પાસે જ નિર્મિત મોટો થયો. ઘરકામથી માંડીને દાદા દાદી ને ફેરવવા, સમયસર દવાખાને લઈ જવા જેવી બધી જ જવાબદારી નિર્મિત સુપેરે નિભાવતો. સમય જતા
નિર્મિત કોલેજમાં આવી ગયો. એક દિવસ અચાનક સમાચાર આવ્યા કે નિર્મિતે આત્મહત્યા કરી લીધી. પાછળથી ખબર પડી કે નિર્મિત મનમાં ને મનમાં ધૂંટાતો હતો. મનની વાત કોઈને કહી શક્યો નહી ને આત્મહત્યા કરી લીધી. જો કલ્પના માસી જીવતા હોત તો નિર્મિત આ પગલું ના ભરત. પોતાના સગા પુત્ર માટે જીવ આપવા રાજી થતી એક સ્ત્રી પોતાના સાવકા પુત્રને હૂંફ પણ ન આપી શકે તો એ ખરેખર સ્ત્રી કહેવાને લાયક છે ખરી? ખરેખર તો એ સ્ત્રી ના નામ પર એક અભિશાપ છે અને નિર્મિતની આ આત્મહત્યા નહી પણ એક હત્યા છે અને એના માટે માસા પણ એટલા જ જવાબદાર છે. આવું મનોમન વિચારી રહેલી માનસી નિર્મિતના બેસણાંમાં પોતાના આંસુ ઓને ન ખાળી શકી.
