જન્મારો ટૂંકો પડશે, એને સજાવટમાં,
ચણતાં ચણી દીધો છે, જે મહેલ તેં હવામાં !
સ્વપ્નોનાં દઈ રમકડાં, રાખે છે ઊંઘવામાં,
રાતો તો જાગવાની સૂરજને ઢાંકવામાં !
બાકી કશું ન રાખ્યું ખોટું લગાડવામાં,
તેં પણ કમાલ કીધા અવસર બગાડવામાં !
સાથી સહજતા સાધે જો સાથ આપવામાં,
પામી જવાશે અઢળક, કિરદાર જાણવામાં.
છે ફાયદો આ મોટો, સરનામું આપવામાં !
એની નજીક જવાશે, રસ્તો બતાડવામાં.
*બચતું રહે છે કોઈ,રંગાઈ જાય કોઈ,*
*મશગૂલ રહે છે તું તો બસ રંગ છાંટવામાં !*
આપે છે કોણ આવી સવલત છકી જવાની ?
એને જ ભૂલી જાઓ એને પુકારવામાં !
વહેતા સમયની સાથે વહેવું જચી રહ્યું છે,
પડવું નથી હવેથી દૃશ્યો મઠારવામાં.
છેલ્લો વિકલ્પ છે કે ઢોળાઈ જાય શબ્દો,
હસ્તી મટી ગયાની મસ્તીને ઢાળવામાં !
#સજાવટ
