❛અવનવા પ્રસંગો છે, મુજ રીતે લડી લઉં છું,
કો’ સમે હસી દઉં છું, કો' સમે રડી લઉં છું.
વિશ્વથી અનોખી છે, રીત મુજ વિલાપોની,
હાસ્યને બહાને પણ ખૂબ હું રડી લઉં છું.
લાખ વાતે મનગમતું આ નથી ઘડાતું મન,
જિંદગી તો જેવી હું ચાહું છું ઘડી લઉં છું.
સ્વર્ગ હો કે હો પૃથ્વી દૂર ક્યાં જવાનીથી,
એક ફાળમાં બંને દુનિયા આથડી લઉં છું.
હુંય એ વિચારું છું, આ કઈ બિમારી છે,
હેતુ વિણ હસી દઉં છું, અર્થ વિણ રડી લઉં છું.
કર્મ કો’ છે ક્યાં કીર્તિ લોભથી ખાલી,
પુણ્યના સહારે પણ પાપમાં પડી લઉં છું.❜
