ખોવાયેલી યાદો
તસવીરો જોઈને આજે ભીજાય છે આંખો,
હૈયે વસેલી મારી શૈશવની એ પ્રેમભરી યાદો.
હતી રોમાંચક એ આબળી પીપળીની રમતો,
સાતતાળી ને અમદાવાદ ને સાથે રમાતો થપ્પો.
ઉતરાયણનુ એ ઉધિયુ ને પતંગ કાપતો સુરતી માંજો
વધેલી દોરીએ થતો લંગચિયાપેચનો ઝપાટો.
હોળીએ દેખાતો આપણો વાન રૂપાળો,
ધુળેટી રમી લેતા ના મળતો કોઈ સિકલનો તાળો.
દફતર ઉપાડી સ્કુલ જતો દોસ્તોનો એ મેળાવડો,
શનિવારે થતી કસરતો નો મસ્તી ભર્યો હારમાળો.
રૂપિયાની ચોકલેટમાં તો મહિનો ખુશ થાતા,
આજે સો રૂપિયાના ખાવામાં પણ ક્યાં હરખ થાતા.
વધી છે આજે સગવડો ને સુખ સાહ્યબી,
પણ ખુટે છે આજ સૌમાં સંતોષ ને પ્રેમની લાગણી.
ડૉ.રિધ્ધી મહેતા "અનોખી"
* * * * *
