આ તે કેવો વરસાદ?
ડોળ હોય તો ડહોળી નાખજે તું
સ્પષ્ટ કહું વરસાદ આજે તને હું
પરિપક્વ ન હોય જો પ્રેમ તારો તો
ક'દિ માંગીશ નહીં તારી પાસે હું.....
ડોળ હોય તો...
મેઘ આડંબર કરે આકાશે ગરજીને
' ને વરસે તું ય વહેવાર સમજીને
આ સૂરજ પણ હાંસી ઊડાવે પછી
વાદળ આડેથી મલકી મલકીને......
ડોળ હોય તો...
લાગણી દબાવી દઈ રીત નિભાવી
આ ફિતરત કેવી તેં હવે અપનાવી?
મન મોકળું કરી જરા ખેલી જો હોળી
ઉત્કટ પ્રેમથી ધરાને તું કર ભીની......
ડોળ હોય તો...
તને એમ કે કરગરી રડી પડીશ હું
આ ધરાને હજૂ ન ઓળખે છે તું
ખમ્યા છે કંઈક દરદ પથ્થર થઈ
હવે બાકી કઈ કસોટી કરે છે તું?......
ડોળ હોય તો...
©અર્ચિતા દીપક પંડ્યા
