નિયતિ
કોઈ વાર
હું
ધરતીના પેટાળનો
લાવા મારામાં
સમાવ્યો હોય
એવું અગન પંખી
હોઉં છું,
કોઈ વાર ઠંડકને
સહજ કરી લીધી હોય
એવી સિલ માછલી!
કોઈ વાર ધરતી પરથી પણ
આકાશને સમેટવા
મથતી નાનકડી ચકલી!
કોઈવાર આકાશ સર કરનાર,
આકાશથી ચીલ ઝડપે
ધરા પર
શિકાર કરનાર
સમડી!
અનેક રૂપને
નિભાવતી
મારામાં જીવતી
એક સખશિયત
નિયતિએ મંજૂર કરેલા
ઉતાર ચડાવથી
પસાર થઈ રહી છે.
અને આત્મા એનું
જન્મ જન્મના ફેરાનું
જ્ઞાન એકત્ર કરી રહ્યો છે,
ત્યારે
ઈશ્વર પણ
સમય માપી
ઘડી જોઈ લે છે
મિલન ના નિયત સમયની
પ્રતીક્ષામાં!
©અર્ચિતા દીપક પંડ્યા
