" વર્ષાનું આગમન "
કોરા કાગળ જેવા મનમાં, વર્ષાની થઈ સોગાત,
જોને આવી સૃષ્ટિ કાજે, કેવી ઘડી આ રળિયાત.
ઘેરાયાં છે વાદળ નભમાં, પવન લાવ્યો છે પેગામ,
ધરતીના કણ-કણમાં જાગી, ઉત્સવની શરૂઆત.
ચકલી, મોર, કોયલ ટહુક્યા, સીમ બધી હરખાઈ,
ઝરમર વરસ્યા ફોરાં ને, ખીલ્યું મોસમી પ્રભાત.
મઘમઘ મહેકી ઊઠી ધરા ને, છે ખુશ્બૂનો અંબાર,
લાગે કુદરતની આજે, આ ધરતી પર છે ખેરાત.
તન સાથે મન ભીંજવીએ, આ પહેલા વરસાદમાં,
વરસાદી માહોલમાં "વ્યોમ" કરીએ દિલની વાત!
✍...© વિનોદ. મો. સોલંકી "વ્યોમ"
જેટકો (જીઈબી), મુ. રાપર
