ચાલને થોડું જરા વ્હાલ વાવી જોઈએ
ઊગે છે શું? જરા તપાસી તો જોઈએ
એમાં કાંઈ બહુ ઝાઝું નહીં જ જોઈએ
કે નહીં એમાં બહુ સામટું કાંઈ ખોઈએ
બસ બે એક મીઠાં બોલ ને એક મીઠી નજર
નજરમાં સહજ નેહ,ને બોલમાં વાસંતી સમર
સમરને પાનખર તણી ઝાંકળની વાત કહીએ
હેતાળ હથેળીમાં ઝાંકળના નીર ભરી જોઈએ
મીંઢા મુક્કા ને ચાલને અંજલિ બનાવી જોઈએ
ચાલને થોડું જરા વ્હાલ વાવી જોઈએ
વિરાટની વાટ તો બહુ વસમી છે વ્હાલા
ભૂલા પડશું તો નાહક ના ભટકશુ ઠાલાં
આ ભોમિયા'ય રસ્તા બતાવે છે, પોતે ચીતરેલા
ને ગણાવેશે "ઈશ" એને, છે પોતે ધૂળમાં કોતરેલાં
મૂકી વૈરાટ,ચાલ વામન ને ગળે લગાવી જોઈએ
ચાલને થોડું જરા વ્હાલ વાવી જોઈએ
ગણવા જોડવાની આંહીં રૂડી રીત દોડે છે
માંજારી નું ઠીકરું આંહીં મૂષક માથે ફોડે છે
શબ્દો ના ટાંકા મારી ખાલી પહેરણ દોડાવે
ખાલી ખિસ્સામાં આખો કુબેર ભંડાર ગણાવે
ફક્ત લખે કે વખતે જીવે છે એવું,ચાલ જેઠાને પણ અજમાવી જોઈએ
ચાલને થોડું જરા વ્હાલ વાવી જોઈએ
