"મિચ્છામિ દુક્કડમ્"
અંતરના અહંકાર ઓગાળી, આજે હૈયું નિર્મળ થાય,
સંવત્સરીના પાવન ટહુકે, ક્ષમા તણો સૂર રેલાય.
જાણતાં કે અજાણતાં જો, કોઈનું દિલ દુભાવ્યું હોય,
કટુ વચન કે વર્તનથી કદી, કોઈનું સ્મિત છીનવાયું હોય;
ગાંઠ જૂની મનમાંથી છોડી, વેર ત્યજી દેવાય,
સંવત્સરીના પાવન ટહુકે, ક્ષમા તણો સૂર રેલાય.
ખામીઓ સઘળા જીવને, ગુણ સર્વના સ્વીકારીએ,
ક્ષમા આપીએ અંતરથી ને, મસ્તક નમાવી યાચીએ;
'ખામૈમિ સવ્વ જીવે'નો, પવિત્ર મંત્ર ગુંજાય,
સંવત્સરીના પાવન ટહુકે, ક્ષમા તણો સૂર રેલાય.
શબ્દોમાં જો સ્નેહ ભળે તો, વિશ્વ આખું મીત બને,
મૈત્રીભાવનું અમી છાંટીએ, સૌ જીવ પર પ્રીત બને;
કહે 'સ્વયમ્'ભૂ' આજ દિને, સાચું તપ આ કહેવાય,
સૌને હૃદયપૂર્વક મિચ્છામિ દુક્કડમ્ કહેવાય.
અશ્વિન રાઠોડ — "સ્વયમ્'ભૂ"
